कतारका लागि नवनियुक्त राजदुत पौडेलको स्वागत, पासपोर्ट नविकरणको विषयमा सबैभन्दा धेरै जन गुनासो…..

दोहा कतार – कतारका लागि नवनियुक्त राजदुत रमेश चन्द्र पौडेलको स्वागत तथा परिचयात्मक कार्यक्रम शुक्रबार सम्पन्न भएको छ । गैरआवासीय नेपाली संघ, राष्ट्रिय समन्वय परिषद कतारको आयोजना र कतारमा स्थापित विभिन्न संघ संस्थाका प्रमुख तथा प्रतिनिधिहरुको उपस्थितिमा दूतावासकै सभाहलमा कार्यक्रम सम्पन्न भएको हो ।

एनसीसी कतारका अध्यक्ष रमेश भट्टको सभापतित्व र महामहिम राजदूत पौडेलकै प्रमुख आतिथ्यतामा सम्पन्न भएको कार्यक्रममा सहभागीहरुले दोहामा रहेका नेपाली श्रमिकहरुको समस्या राखे पनि अधिकाङ्शले पासपोर्ट नवीकरणमा श्रमिकले भोग्दै आएको समस्याको बारेमा राजदूतको ध्यानाकर्षण गराएका थिए । उनिहरुले श्रम रिन्युको अप्रुभल समयमै नहुने, पासपोर्टको स्लट नखुल्ने, आजात भिषमा बसेकालाई कम्पनीले आइडी नलगाई दिने, दूतावासको फोन नउठ्ने लगायत श्रमिकको अन्य थुप्रै विभिन्न समस्याहरु राखे पनि पासपोर्ट नवीकरणको विषयमा श्रमिकले झेल्दै आएको समस्या प्राथमिकताको साथ उठाएका थिए ।

कार्यक्रममा सहभागी मध्य केही वक्ताहरुले अनलाइनमा स्लट नखुल्ने र दूतावासमा बुझ्न आउदा गेटमै विचौलियाहरुले केही रकम लिएर काम गर्दिने गरेको बताउदै यो प्रवृतिले गर्दा न्यून स्तरका श्रमिकले सास्ती खेप्नु परेको र यस विषयमा दूतावास जानकार रहेर पनि मुख दर्शक बनेर बसिरहेको भन्दै आक्रोश पोखे भने कतिले राजदूत कुनै दलको नभएर कतारमा भएका सम्पुर्ण नेपालीहरुको अभिभावक भएको हुँदा श्रमिकको समस्य समाधानको लागि निष्पक्ष रुपमा कदम बढाउनु पर्ने सुझाव समेत दिए ।

गुनासो र सुझाव राख्ने क्रममै कतारमा रहेको नेपालीहरुको जनसंख्याका आधारमा राहदानी जारी गर्न राजदूत मार्फत परराष्ट्रमन्त्रीको ध्यानाकर्षण गराउँदै दूतावासले समाधान गर्न नसकेका श्रमिकको समस्या कतारमा रहेको मानवअधिकारलाई रिफर गर्न समेत उनीहरूले सुझाव दिनुको साथै कतारमा फ्रि भिसाका नाममा लाखौं असुली हुने गरेको प्रति चिन्ता व्यक्त गरे । दूतावासमा खराब शीर्षकमा उजुरी परेका कुनै पनि कम्पनीको डिमान्ड पुनः स्वीकृति नगर्न आग्रह गर्दै दूतावासले पटकपटक केस परेका कम्पनीको पनि डिमान्ड स्वीकृत गर्ने गरेको प्रति असन्तुष्ट व्यक्त गरे ।

उनिहरुले नेपाली दूतावासले छिटो कल्चरल हाउस खोल्न सके हप्तै पिच्छे बाहिरिने लाखौं रुपैयाँ नेपालमै भित्र्याउन सकिने हुँदा कल्चरल हाउसको आवश्यकतालाई प्राथमिकतमा राख्दै नेपाली विद्यालयको व्यवस्था सहित कतारका युनिभर्सिटीमा नेपाली विद्यार्थीहरूका लागि छात्रवृत्तिको पहल गर्न सुझाव सहितको आग्रह समेत गरेका थिए ।

पछिल्लो समय कतारमा ‘म सीआईडीको मान्छे हुँ’ भन्दै गुण्डागर्दी गर्ने, धम्की दिने तथा ठग्ने कार्य पनि अत्याधिक रुपमा भइरहेको हुँदा त्यसलाई रोक्न र त्यस्ताविरुद्ध उजुरी परेमा दूतावासले आवश्यक कारबाही गर्न हिचकिचाउन नहुने बताउँदै  कतिपय तराईवासीलाई भाषामा समस्या पर्ने गरेको हुँदा दूतावासले सहजीकरण गरेर केही हदसम्म भए श्रमिकलाई सहज बनाइदिन आग्रह गरे ।

एनसीसी कतारका महासचिव रबिन मगरले सहजीकरण गरेका कार्यक्रम अवधिभर उठाएका यावत विषयहरुलाई सम्बोधन गर्दै राजदूत पौडेलले आफू कतार आएको थोरै मात्र समय भएको र काम गर्नकै लागी आएको बताउदै यहाँ देखिएका हरेक समस्याहरुलाई कसरी ब्यवस्थित गर्न सकिन्छ भने कुरामा दूतावासले गृहकार्य थालिसकेको बताए । उनले पासपोर्ट नवीकरणको विषयमा पनि म्याद सकिइ सकेको र अत्यावश्यक भएकाहरु लाई प्राथमिकतामा राखेर काम गर्नको लागि दूतावासले केही विकल्पहरु बनाएर काम गर्दै आएको बताएका छन ।

पौडेलले कतारमा अरु धेरै समस्याहरु रहेको र त्यसलाई सरल र सहज बनाउनको निमित्त दोहामा भएका सम्पूर्ण संघ संस्था सङ्ग निरन्तर समन्वय गरेर अघि बढ्ने बताए भने सबै समस्य एकै साथ सुल्झाउन नसक्ने हुँदा केही समय लाग्ने र आफुले श्रमिकको समस्यहरुलाई बिशेष महत्त्वका साथ हेर्ने प्रतिबद्धता गरेका छन ।

कार्यक्रमको अन्तमा सभापति भट्टले सिस्टम र चाहाना राखेर काम गर्ने हो भने कतारमा नेपाली समाजले अहिले देखिइ रहेको अधिकाङ्श समस्याहरुको समाधान गर्न सकिने बताए । उनले कतारमा नेपाली विद्यालय, कल्चरल हाउस संचालनको कतार सरकार र कतार च्यारिटी समन्वय र सहकार्यको लागि सकारात्मक हुँदा पनि आफुले त्यस बिषयमा पछि हटेको महसुस गरेको बताए । भट्टले थप बोल्दै एउटा विद्यालय मात्रै संचालन गर्न सक्ने हो भने नेपालीहरुले नेपालबाट कलाकार ल्याएर दोहामा गर्ने विभिन्न कार्यक्रमहरुको लागि हल अप्रुभल र व्यवस्थापन देखिएको कठिनाइ लाई सहज बनाउन सकिने र हरेक हप्ता बाहिर जाने गरेको मोटो रकम नेपालमै पठाउन सकिनुको त्यसै रकमबाट विद्यालय संचालन पनि गर्न सकिने बताए ।

कार्यक्रममा उपस्थित सम्पुर्णलाई सम्बोधन गर्दै एनसीसी कतारका प्रथम उपाध्यक्ष कृष्ण पन्थीले स्वागत मन्तव्य राखेका थिए ।

यो समाचार पढेर तपाईंलाई कस्तो लाग्यो आफ्नो मनमा लागेको कुरा तल कमेन्ट बक्समा लेखिदिनु होला तपाईंको अमुल्य कमेन्ट लाई हामी सधैं सल्लाह सुझावको रुपमा लिनेछौं ।