काठमाडौं । राष्ट्रिय स्वतन्त्र पार्टी (रास्वपा) की सांसद डा. तोषिमा कार्कीले नेपालमा स्यानिटरी प्याड उत्पादनको पूरा क्षमता प्रयोग हुन नसकेको बताउँदै नीतिगत सुधारको आवश्यकता रहेको औंल्याएकी छन्।
आइतबार प्रतिनिधि सभाको शून्य समयमा बोल्दै उनले नेपालमा वार्षिक ३० करोड थान स्यानिटरी प्याड उत्पादन भए पनि स्वदेशी उत्पादन क्षमता ९० करोड थान रहेको र सो अनुसार उत्पादन हुन नसकेको उल्लेख गरिन्।
‘नेपालमा विभिन्न देशबाट स्यानिटरी प्याड आयात गरिन्छ। तर, यहाँको उत्पादन क्षमताको मात्र एक तिहाइ उपयोग भइरहेको छ। यसको मुख्य कारण भनेको आयातित प्याडको तुलनामा कच्चा पदार्थ आयात गर्दा बढी भन्सार महसुल लाग्नु हो,’ उनले भनिन्।
उनका अनुसार, नेपालमा आयातित स्यानिटरी प्याडमा भन्सार छुट दिइएको भए पनि यसको वास्तविक लाभ लक्षित उपभोक्ताले पाएका छैनन्। ‘भन्सार छुटको फाइदा उपभोक्ताभन्दा बिचौलियाले लिइरहेका छन्। नियमनको अभावले गर्दा यो स्वार्थप्रेरित निर्णय भएको आशंका उब्जिएको छ,’ उनले थपिन्।
सांसद कार्कीले समस्या मात्र होइन, समाधानका उपायहरू पनि प्रस्तुत गरिन्। उनले स्यानिटरी प्याड उत्पादनमा आत्मनिर्भर बन्न र प्रतिस्पर्धा गर्न कच्चा पदार्थ आयातमा लाग्ने भन्सार शुल्क घटाउनु आवश्यक रहेको बताइन्।
‘यदि कच्चा पदार्थको भन्सार शुल्क घटाइयो भने स्वदेशी उत्पादन सुलभ, सुपथ र गुणस्तरीय बन्न सक्छ। यसले स्वदेशी उद्योगलाई प्रवर्द्धन गर्नेछ र विदेशी उत्पादनसँग प्रतिस्पर्धा गर्न सक्षम बनाउनेछ,’ उनले भनिन्।
यस्तै, सरकारी विद्यालयहरूमा वितरण गरिने निःशुल्क स्यानिटरी प्याडको प्रभावकारीता सुनिश्चित गर्न कडा अनुगमन र नियमन आवश्यक रहेको सांसद कार्कीको भनाइ छ। ‘सरकारले विद्यालयहरूमा वितरण गरिने प्याडको गुणस्तर र उपलब्धता सुनिश्चित गर्दै नियमन प्रणालीलाई मजबुत बनाउनु पर्छ,’ उनले सरकारलाई आग्रह गरिन्।
प्रतिक्रिया दिनुहोस्