काठमाडौं । नेपाल विद्युत् प्राधिकरणका प्रमुख कुलमान घिसिङलाई हटाउने सरकारको निर्णय सत्तापक्षकै नेताहरूले आलोचना गरेका छन् । नेपाली कांग्रेसका महामन्त्रीहरू गगन थापा र विश्वप्रकाश शर्मालगायत नेताहरूले यसलाई गलत कदम भन्दै असन्तुष्टि जनाएका छन्।
महामन्त्री थापाले घिसिङलाई हटाएर सरकारले जनआक्रोशको आगोमा मट्टितेल थप्ने काम गरेको टिप्पणी गरेका छन्। सरकारको काम प्रभावकारी बनाउन जिम्मेवार पदमा रहेका थापाले जनताको असन्तुष्टिको लाभ उठाउँदै केही समूह स्वार्थ पूरा गर्न सक्रिय रहेको पनि बताएका छन्।
थापाले फेसबुकमा लेखेका छन्, ‘जनतामा असन्तोष छ। हामी दिनरात मेहनत गर्दै छौँ कि सरकारको डेलिभरीबाट असन्तुष्टि कम होस्। तर सरकार आफैं उल्टो काम गर्दै असन्तुष्टिलाई झन् बढाउने निर्णय किन गर्दैछ?’
उनले सरकारलाई सचेत गराउने प्रयास गरिरहे पनि अन्तिममा गलत निर्णय लिइएको भन्दै प्रश्न गरेका छन्। ‘मन्त्रीहरूले बाटो बिराए भने प्रधानमन्त्रीले सुधार्नुपर्ने हो, तर त्यस्तो भएन। गलत निर्णय गरियो। उल्टो बाटो हिंडेर सही गन्तव्यमा पुगिँदैन,’ उनले भने।
यस्तै, कांग्रेस महामन्त्री शर्माले कुलमानलाई हटाउने निर्णय पार्टीभित्रकै सहमतिबाट नगरिएको बताएका छन्। उनले घिसिङलाई बाँकी अवधि काम गर्न दिनुपर्थ्यो भन्दै सरकारलाई सचेत गराइएको खुलासा गरेका छन्।
‘यदि कारबाहीयोग्य केही थियो भने, पछि पनि गर्न सकिन्थ्यो। सरकारको निर्णय समय सान्दर्भिक छैन, यो गलत छ। यसमा हाम्रो प्रष्ट असहमति छ,’ शर्माले भने।
कुलमान हटाउने निर्णयले प्रमुख प्रतिपक्ष माओवादी केन्द्रलाई पनि आक्रोशित बनाएको छ। माओवादी अध्यक्ष पुष्पकमल दाहाल प्रचण्डले सरकारको यो कदमको आलोचना गरेका छन्।
फेसबुकमा उनले लेखेका छन्, ‘जनताले चरम लोडसेडिङको दुःख भोगिरहेको बेला हाम्रो नेतृत्वमा कुलमानलाई विद्युत् प्राधिकरणको कार्यकारी निर्देशक बनाइएको थियो। उनको दक्षता, क्षमता र हाम्रो संयुक्त प्रयासले उज्यालो नेपाल निर्माण सम्भव भएको थियो। तर, लामो समयदेखि सरकार उनलाई हटाउने योजनामा थियो, जुन अहिले कार्यान्वयन भएको देखिन्छ। आशा गरौं, यो खबर असत्य होस्। यदि सत्य हो भने, यो निर्णय गलत र आपत्तिजनक छ।’
यस्तै, माओवादीका प्रवक्ता अग्नि सापकोटाले पनि सरकारको निर्णयको विरोध गरेका छन्। ऊर्जाराज्यमन्त्री कान्छाराम तामाङसमेत घिसिङलाई हटाउने निर्णयको विपक्षमा रहेको खुलेको छ।
राष्ट्रिय स्वतन्त्र पार्टीकी सांसद तोसिमा कार्कीले पनि सरकारको निर्णयको आलोचना गर्दै कुलमानलाई हटाएर जनताको आक्रोश झन् बढाउने काम गरिएको बताएकी छन्।
उनले सामाजिक सञ्जालमा लेखेकी छन्, ‘दुई तिहाइ बहुमतको सरकारले एउटा सक्षम कर्मचारीलाई हटायो, जसले १८ घण्टे लोडसेडिङ अन्त्य गरेर जनतालाई उज्यालो दिएको थियो। कहिले रवि, कहिले बालेन, कहिले कुलमान— राम्रो काम गर्नेहरूलाई किन दुःख दिइन्छ? लोकतन्त्रको खोल ओढेको सरकारलाई बधाई छ!’
कुलमान हटाउने सरकारको निर्णयविरुद्ध सामाजिक सञ्जालमा चर्को आलोचना भइरहेको छ। सोमबार सिंहदरबारमा बसेको मन्त्रिपरिषद् बैठकले घिसिङलाई हटाएर हितेन्द्रदेव शाक्यलाई कार्यकारी निर्देशक बनाउने निर्णय गरेको एक मन्त्रीले बताएका छन्। तर, सरकारका प्रवक्ता पृथ्वीसुब्बा गुरुङले भने निर्णयबारे कुनै जानकारी दिएका छैनन्। रातो पाटी बाट साभार
प्रतिक्रिया दिनुहोस्