रामेछाप – युवतीलाई जिस्क्याएको निहुँमा रामेछापका एक युवकले आफ्नै साथीको हत्या गरेका छन्। ललितपुरको महालक्ष्मी नगरपालिका–४, ओचु हाइटस्थित मन्दिरअगाडि गए राति हत्या भएको प्रहरीले जनाएको छ।
हत्या गरिएका व्यक्ति ३० वर्षीय रिपक खाती हुन्, जो रामेछापका स्थायी बासिन्दा भए पनि ओचु हाइटमा बस्दै आएका थिए। प्रहरीले हत्याको आरोपमा त्यही ठाउँमा बस्ने २५ वर्षीय सुमन रसाइलीलाई पक्राउ गरेको छ। खातीमाथि खुकुरी प्रहार भएको थियो।
गए राति करिब १२:४५ बजे हत्या भएको खबर पाएपछि प्रहरी परिसर र सातदोबाटो वृत्तको टोली घटनास्थलमा पुगेको थियो। प्रहरीले राति नै मुचुल्का तयार गरी बिहीबार बिहान करिब ४ बजे शव पोष्टमार्टमका लागि पाटन अस्पताल पठाएको छ। प्रारम्भिक अनुसन्धानका आधारमा प्रहरीले घटनामा अहिलेसम्म सुमन मात्र संलग्न रहेको निष्कर्ष निकालेको छ।
प्रहरीका अनुसार सुमन र रिपक पहिलेबाटै चिनजानका थिए। सुमनकी करिब १५ वर्षकी बहिनी रहेको र रिपकले उनलाई जिस्क्याउने गरेको खुलेको छ। पहिलेदेखि नै यस्तो घटना भएको र त्यसबेला सम्झाइबुझाइ गरिएको भए पनि रिपकले फेरि जिस्क्याएको भन्दै सुमनकी बहिनीले बुधवार दाइलाई सुनाएकी थिइन्।
त्यसपछि सुमनले राति नै रिपकलाई मन्दिरमा बोलाएका थिए। चिनजान भएकाले रिपक पनि निस्फिक्री आए। तर, मन्दिरमा पुगेपछि सुमनले खुकुरी प्रहार गरी उनको हत्या गरेका थिए।
प्रतिक्रिया दिनुहोस्