काठमाडौं । प्रधानमन्त्री केपी शर्मा ओलीले आफ्नो आगामी चीन भ्रमणबारे संसदलाई जानकारी दिएका छन्। शुक्रबार प्रतिनिधिसभाको बैठकलाई सम्बोधन गर्दै उनले भ्रमणको विवरण प्रस्तुत गरेका हुन्।
आज बसेको मन्त्रिपरिषद् बैठकले प्रधानमन्त्री ओलीको भोलिदेखि सुरु हुने चीन भ्रमण स्वीकृत गरेको छ। ओलीसहितको प्रतिनिधिमण्डल भदौ १४ गतेदेखि १८ गतेसम्म चीन भ्रमणमा रहनेछ।
चिनियाँ राष्ट्रपति सी चिनफिङको निमन्त्रणमा प्रधानमन्त्री ओली बुधबारसम्म चीनमा रहने कार्यक्रम छ। भ्रमणका क्रममा उनले सांघाई सहयोग संगठन (एससीओ) शिखर सम्मेलनमा समेत भाग लिनेछन्।
भ्रमण टोलीमा प्रधानमन्त्रीकी श्रीमती राधिका शाक्य, शिक्षामन्त्री रघुजी पन्त, पर्यटनमन्त्री बद्रीप्रसाद पाण्डे, नेपाली कांग्रेस उपसभापति पूर्णबहादुर खड्का, प्रधानमन्त्रीका आर्थिक सल्लाहकार डा. युवराज खतिवडा, सांसद् छविलाल विश्वकर्मा लगायत उच्च अधिकारीहरू सहभागी हुने जनाइएको छ।
एससीओ सम्मेलन भदौ १५ र १६ गते उत्तरी चीनको तियान्जिनमा हुँदैछ। सम्मेलनको उद्घाटन राष्ट्रपति सीले गर्नेछन् भने भारतीय प्रधानमन्त्री नरेन्द्र मोदीसहित अन्य मुलुकका राष्ट्र तथा सरकार प्रमुखहरू सहभागी हुनेछन्।
परराष्ट्र मन्त्रालयका अनुसार, प्रधानमन्त्री ओलीले भ्रमणका क्रममा राष्ट्रपति सीसँग द्विपक्षीय भेटवार्ता गर्ने कार्यक्रम छ। भदौ १७ गते उनी तियान्जिनमा हुने एससीओ प्लस शिखर सम्मेलनलाई सम्बोधन गर्नेछन्।
भ्रमणका क्रममा ओलीले विभिन्न मुलुकका नेताहरूसँग भेटवार्ता गर्नेछन्। सोही क्रममा उनले चीनका उपराष्ट्रपति हान झेङसँग पनि भेट्ने कार्यक्रम तय भएको छ।
यसैगरी, प्रधानमन्त्री ओलीले जापानी आक्रमणविरुद्ध चीनले गरेको प्रतिरोध युद्ध र विश्व फासिवादविरोधी युद्धमा विजयको ८०औं वार्षिकोत्सव कार्यक्रममा समेत सहभागिता जनाउनेछन्।
प्रतिक्रया दिनुहोस्