दोहा,कतार- कतारमा बसोबास गर्दै आएका नेपाली संगीतप्रेमीहरूका लागि फेरि अर्को एउटा विशेष र रोमाञ्चक सांगीतिक अवसर जुट्ने भएको छ।
नेपालमा युवा पुस्ता माझ निकै लोकप्रिय बन्न सफल भएको ब्याण्ड ‘केहार एण्ड द लुङ्गा’ आफ्नो साङ्गीतिक प्रस्तुतिको लागि पहिलो पटक कतार आउने भएको छ। इफ्लिक्स इन्टरटेनमेन्टको ब्यानरमा आयोजना हुन लागेको यस भव्य लाइभ सांगीतिक कार्यक्रम आगामी शुक्रबार, अर्थात ७ अगस्टको दिन दोहास्थित भि आई पी होटलको एम फ्लोरमा रहेको प्लानेट लाउन्ज क्लबमा हुन लागेको हो ।
कार्यक्रमको समय नजिकिदै गर्दा दोहाको नेपाली समाजमा ब्याण्डको चर्चा परिचर्चा सङ्गै व्यापक रुपमा प्रचारप्रसार भइरहेको छ भने कार्यक्रमको सम्पूर्ण तयारी अन्तिम चरणमा पुगेको कार्यक्रम संयोजक रोशन अर्यालले जानकारी गराएका छन । अर्यालले बताए अनुसार कार्यक्रमको लागि साँझ ६ बजेदेखि हलको ढोका खुल्ने र राति ८ बजेदेखि १२ बजेसम्म निरन्तर ४ घण्टा ब्याण्डको बेजोड लाइभ साङ्गीतिक प्रस्तुतिहरु रहने तालिका रहेको छ ।
ब्याण्डका मुख्य गायक केहार सिंह लिम्बुको सशक्त गायकी र उत्कृष्ट संगीत संयोजनका लागि चिनिने यो टोलीले कतारको मञ्चमा आफ्ना चर्चित तथा दर्शकले अत्यधिक रुचाएका कहाँ छौ, सोल्टिनी, सरर सरर, लाएको माया, बैगुनी, बहाना, तिमीलाई सम्झेर २, र ‘खेरै जाने माया, जस्ता लोकप्रिय आधुनिक तथा फ्युजन गीतहरू प्रत्यक्ष रूपमा प्रस्तुत गर्नेछन् ।
आयोजक समितिले कार्यक्रम हुने हलको क्षमतालाई ध्यानमा राख्दै सिट सङ्ख्या सीमित गरिएको बताउदै पहिला आउनेलाई पहिलो प्राथमिकताको आधारमा प्रवेश दिइने जनाएको छ भने अग्रिम सिट बुकिङका लागि ७०६६ ५६४४, ७०८१ ७५०१ र ७५०१ ७५०२ मा सम्पर्क गरि आफ्नो सिट सुरक्षित गर्न सकिने पनि बताएका छन ।
प्रवासको व्यस्त जीवनबाट केही समय निकालेर कार्यक्रममा सहभागी भैई परिवार, साथीभाइ र आफन्तहरू सँग नेपाली संगीतको उत्सव मनाउन र यो साँझलाई अविस्मरणीय बनाउन आयोजक समितिले कतारबासी नेपालीहरूमा आह्वान गरेका छन ।
प्रतिक्रया दिनुहोस्