दोहा कतार – नेपाली गीत सङ्गीतलाई अन्तर्राष्ट्रिय स्तर सम्म पुर्याउने उद्देश्यको साथ “संसारभरका नेपाली जातिका लागि, नेपाली साँस्कृतिक एकताको अभियान” भन्ने मुल नारालाई आत्मसात गर्दै गत वर्षबाट सुरु गरिएको सर्वाधिक पुरस्कार राशी भएको दुई रियालिटी शो “मेरो भ्वाइस युनिभर्स र मेरो डान्स युनिभर्स” को दोस्रो सिजनको अडिसन कतारमा पनि हुने भएको छ ।
गत बिहीबार साँझ सनैयाको फुलबारी रेष्टुरेन्टको सभाहलमा भएको मिट एण्ड ग्रीट कार्यक्रम मार्फत इन्ट्रा नेसनल वलफेयर एण्ड सपोर्ट फाउन्डेसन अफ अमेरिकाको आयोजनामा बिश्वभर छरिएर रहेका कला र गला भएका नेपालीभाषीहरु बाट गायन तथा नृत्य बिधामा सर्वोत्कृष्ट प्रतिभाहरु छनोट गर्नका लागि बिश्वस्तरीय अन्तर्राष्ट्रिय दुईवटा ठुला रियालिटी शोहरुको कतार अडिसन आगामी फेब्रुअरी २१ तारिक शुक्रबार अबु हामुर स्थित आइडियल इन्डियन स्कुलको हलमा हुन लागेको कतार संयोजक शिवराम ढकालले जानकारी गराएका हुन ।
दोस्रो सिजनको अडिसन मध्यपुर्वका दुई देश कतार र दुबई सङ्गै युरोपमा बेलायत र पोर्चुगल, पूर्वी एशियाका थाइल्याण्ड, हंगकंग र जापान, अष्टेलियाको सिड्नी, भारतको सिलिगुरी र मुम्बईको साथै नेपालको विर्तामोड, नेपालगञ्ज, पोखरा र काठमाडौंमा अडिसनहरु हुने भएकोले कलागला भएका प्रतिभावान नेपालीभाषीहरुले आफुलाई पायक पर्ने ठाउँमा उपस्थित भएर छनोटको लागि अडिसन दिन सकिने पनि आयोजक समितिले जानकारी गराएको छ ।
दुबै शोका विजेताहरुले १/१ करोड नेपाली रुपैंया पुरस्कार राशी पाउने कार्यक्रमको लागि प्रत्येक अडिसनबाट प्रतिस्पर्धीको प्रतिभाको स्तर हेरि बढिमा ५/५ जना छनोट गरि नृत्य तर्फबाट १ सय २० र गायन तर्फबाट १ सय २० गरि जम्मा २ सय चालीस प्रतिस्पर्धीलाई काठमाडौ लगिने छ भने यो सिजनको मेरो भ्वाइस युनिभर्सको लागि बरिष्ठ गायक दीप श्रेष्ठ, संगीतकार सुरेश अधिकारी, गायकहरु शिव परियार र पुष्पन प्रधान, गायिका अञ्जु पन्त र तृष्णा गुरुङ र मेरो डान्स युनिभर्सको लागि बरिष्ठ कलाकार मिथिला शर्मा, नायक दीलिप रायमाझी, चर्चित अभिनेतृ शिल्पा मास्के, चर्चित कोरियोग्राफरहरु शंकर विसी, कविराज गहतराज र किरण थापा निर्णायक (जज) को भूमिकामा रहने छन ।
त्यस्तै मेरो भ्वाइस युनिभर्सलाई विशाल भण्डारीले निर्देशन गर्ने छन भने डान्स युनिभर्सको लागि निर्देशन विषयमै अध्ययन पूरा गरेकी मौसमी गुरुङ अनुबन्धित भएकी छिन । दुबै शो मा रिमा विश्वकर्मा, नरेश भट्टराई, राजा राजेन्द्र पोखेल र नम्रता श्रेष्ठ जस्ता चर्चित कार्यक्रम प्रस्तोताहरु प्रस्तोताको रुपमा देखिने भएका छन ।
नेपालभित्र र संसारको जुनसुकै कुनैमा बसेको भए पनि नेपाली कला, संस्कृतिप्रति अगाध आस्था र विश्वास राख्ने र यो क्षेत्रमा सहभागी भएर आफ्नो समुदायलाई विश्वभरि नै परिचित बनाउन सक्छु भन्ने अभिलाषा राख्नु हुने सम्पूर्ण नेपालीभाषी प्रतिभालाई लक्षित गरि आयोजना गरिएको कार्यक्रममा क्रमश दोस्रो हुनेले २५ लाख, तेस्रो हुनेले १० लाख र उत्कृष्ट १० प्रतिभाले जनही १/१ लाख नेपाली रुपैयाँ पुरस्कार पाउने छन ।
फाउन्डेसनका एक्ज्युकेटिभ डाइरेक्टर चुडामाणी भट्टराई को सभापतित्व र गैरआवासीय नेपाली संघ, राष्ट्रिय समन्वय परिषद कतारका प्रथम उपाध्यक्ष कृष्ण पन्थिको प्रमुख आतिथ्यतामा सम्पन्न मिट एण्ड ग्रीट कार्यक्रममा दुबै शोहरुको बारेमा कतार अडिसनका कार्यक्रम संयोजक शिवराम ढकाल र मिडिया संयोजक तिलु शर्मा पौडेलले जानकारी गराएका थिए । भने कतार अडिसनको लागि निर्णायकको भुमिकामा चर्चित कोरियोग्राफर तथा नृत्य निर्देशक शंकर वि.सी र गायक डम्बर नेपाली आउने छन । अडिसनबाट छनिएका दुबै शोका उत्कृष्ट ५/५ भाग्यमानी प्रतिस्पर्धीहरु आयोजक कै खर्चमा नेपाल जान र प्रतियोगितामा रहुन्जेल खान बस्न पाउने छन ।
परदेश बाटै आफ्नो कला र गला देखाउने अवसर खोजी रहेका प्रतिस्पर्धीहरुले फाउन्डेसनको वभसाइड https://www.intrafoundations.org बाट आवेदन दिई शोमा सहभागी हुन सक्नेछन ।
यो समाचार पढेर तपाईं लाई कस्तो लाग्यो आफ्नो मनमा लागेको कुरा तल कमेन्ट बक्समा लेखिदिनु होला तपाईंको अमुल्य कमेन्ट लाई हामी सधैं सल्लाह सुझावको रुपमा लिनेछौं ।
प्रतिक्रिया दिनुहोस्