क्वालालम्पुर — जनउद्धार केन्द्र मलेसियाले नेपालमा प्राकृतिक विपत्तिबाट प्रभावित नागरिकको राहत तथा उद्धारका लागि प्रधानमन्त्री दैवी प्रकोप उद्धार कोषमा आर्थिक सहयोग गरेको छ।
जनउद्धार केन्द्र मलेसियाका अध्यक्ष केसु थापाका अनुसार संस्थाले तीज विशेष कार्यक्रममार्फत संकलन भएको रकम तथा संस्थाका पदाधिकारी र सदस्यहरूको व्यक्तिगत सहयोगसहित १० हजार मलेसियन रिंगेट (RM) जम्मा गरेको हो। उक्त रकम नेपाली रुपैयाँमा करिब ३ लाख ७३ हजार ५ सय ५० रुपैयाँ बराबर रहेको जनाइएको छ।
अध्यक्ष थापाका अनुसार तीज विशेष कार्यक्रमबाट RM २,६१०, जनउद्धार केन्द्र संस्थाको तर्फबाट RM २,४९७ तथा संस्थाका पदाधिकारी एवं सदस्यहरूबाट RM ४,८९३ गरी कुल RM १० हजार संकलन गरिएको हो।
संकलित रकम प्रधानमन्त्री दैवी प्रकोप उद्धार कोषमा जम्मा गरिएको जनउद्धार केन्द्र मलेसियाले जनाएको छ। विपत्तिको समयमा प्रभावित परिवारलाई राहत उपलब्ध गराउने उद्देश्यले सहयोग गरिएको संस्थाको भनाइ छ।
जनउद्धार केन्द्र मलेसिया मलेसियामा समस्यामा परेका नेपाली नागरिकलाई विभिन्न समयमा सहयोग गर्दै आएको परोपकारी संस्था हो। संस्थाले उद्धार, राहत तथा समस्यामा परेका नेपालीलाई आवश्यक सहयोग उपलब्ध गराउँदै आएको जनाएको छ।
संस्थाका अनुसार जनउद्धार केन्द्र मलेसिया मलेसियामा नेपाली समुदायका लागि स्थापना भएको पहिलो वैधानिक संस्थाका रूपमा समेत परिचित छ।
प्रतिक्रया दिनुहोस्