दोहा,कतार- काभ्रेपलाञ्चोक सेवा समाज कतारले जिल्लाको विभिन्न विद्यालयहरुमा चार लाख बराबरको न्यानो कपडा वितरण गरेको छ ।
“सेवा नै धर्म हो” भन्ने उद्देश्यका साथ स्थापना भएको काभ्रेपलाञ्चोक सेवा समाज कतारले गत अप्रिल- ४ २०२५ मा आयोजना गरेको वनभोज कार्यक्रमबाट संकलित नेपाली रुपैयाँ करिब चार लाख रकमले जिल्लामै भएका केहि विद्यालयका कक्षा १ देखि ५ सम्म अध्यनरत विद्यार्थीहरुलाई न्यानो कपडा तथा शैक्षिक सामग्री वितरण गरिएको समाज उपाध्यक्ष रामहरि चौलागाईंले नेपाली जनता खबरलाई जनाकारी गराउनु भएको छ ।
समाजले उक्त रकमबाट श्री महादेव आधारभूत विद्यालय, भुम्लो ४ चौबासपोखरीमा ३४, श्री सूर्योदय प्रा.वि.चौँरी देउराली ९ गोठपानीमा ३९, श्री भुसुने कालीदेवी प्रा.वि. रोशी २ मा २७, श्री धनलक्ष्मी प्रा.वि. बेथानचोक ६ थिङछापमा ३८, श्री कपुर महाङ्काल प्रा.वि., बेथानचोक ४ मा २३, श्री कुशेश्वर माध्यमिक विद्यालय, तेमाल ९ मेछेपौवामा ७१, श्री नैमिसारण्य संस्कृत गुरुकुलम, बनेपा ६ गोसाईथानमा ६१ सेट ट्र्याकसुट र विभिन्न शैक्षिक सामग्रीहरू वितरण गरी विद्यार्थीहरूलाई सहयोग पुर्याएको हो ।
कार्यक्रम कुशेश्वर माध्यमिक विद्यालयमाको प्राङ्गणमा काभ्रेपलाञ्चोक जिल्ला समन्वय समितिका अध्यक्ष दीपक गौतमको प्रमुख आतिथ्यतामा सम्पन्न गरिएको थियो भने श्री नैमिसारण्य संस्कृत गुरुकुलम, गोसाईथानमा बनेपा नगरपालिका ६ का वडा अध्यक्ष सचिदानन्द केसीको प्रमुख आतिथ्यतामा सम्पन्न गरिएको अभियानलाई सफल बनाउन समाजका अध्यक्ष तिलक श्रेष्ठ, प्रथम उपाध्यक्ष रामहरि चौलागाईं तथा संस्थाका निवर्तमान पदाधिकारी र सदस्यहरूको सक्रिय भूमिका रहेको थियो ।
सामाजिक उत्तरदायित्व र मानवीय सेवाको उत्कृष्ट उदाहरण प्रस्तुत गर्दै काभ्रेपलाञ्चोक सेवा समाजले प्रतिकुल वातावरणको साथै कठिन भौगोलिक अवस्था बिच पनि बालबालिकाहरु लाई न्यानो कपडा र उपयोगी शैक्षिक सामग्री उपलब्ध गराई प्रशंसा योग्य काम सम्पन्न गर्न पाउँदा आफुलाई अत्यन्तै खुशी लागेको र आगामी दिनहरुमा पनि यस प्रकारको सामाजिक कामलाई निरन्तरता दिने उपाध्यक्ष रामहरि चौलागाईंले बताउनु भएको छ ।
प्रतिक्रया दिनुहोस्